Libros e alén

'A Revolução dos Camaleões' EDDY E. JIMÉNEZ PÉREZ (Campo das Letras. 2003)

En poucas ocasións temos a oportunidade de asistir a unha crítica ao socialismo soviético e dos países do Leste europeo, dende unha óptica fondamente socialista.

Eddy Jiménez, analista político cubano e secretario da embaixada cubana en Bulgaria dende o 1986, fai unha análise amena e acertada do que foi o solpor do socialismo dos países do Leste, centrándose en Romanía, Bulgaría, Albania, Polonía, a antiga Checoslovaquia e, en menor medida, na Unión Soviética. Os erros cometidos, en nome do socialismo, nestes países que pasaron, trala morte de Lenín, da ditadura do proletariado ao voluntarismo e á ditadura da burocracia, até chegar, coa Perestroika, á socialdemocracia e, finalmente, ao capitalismo neoliberal. Todo, dende unha perspectiva socialista e dende a experiencia propia do autor, como testemuña dos cambios revolucionarios en Cuba.

'Só o silencio me responde' Anna Akhamátova (Bagaxe de Peto. Rinoceronte Editora. 2008)

A sinceridade e a forza duns textos formados ao redor do compromiso cun mesmo, con canto nos rodea e paga a pena. Unha escrita madura, lonxe daquela máis libiá á que nos ten afeitos a poesía deste século.

Sirva de exemplo este poema:

CORAXE

Sabemos o que hai hoxe na balanza

e o que está acontecendo.

A hora da coraxe tocounos no reloxo,

e a coraxe non nos abandonará.

Non dá medo caermos mortos baixo as balas,

non é amargo quedarnos sen teito.

Pero nós gardarémoste, lingua rusa,

magno verbo ruso.

Levarémoste a través de todo, puro e ceibe,

confiarémoste aos netos salvándote da prisión para

                    sempre!

Ferrol e o que queda por chover

'Ferrol e o que queda por chover' Alberte Momán (Edita lulu.com 2008)

Retomo un libro xa coñecido, para mostrar unha revisión do formato, semella que mellorado, sempre coas limitacións dunha autoedición.

Recordamos un libro orientado cara un público coñecedor da Vila que se inclúe no título. Un localismo que busca redimir á cidade de Ferrol do estigma adquirido maiormente durante o franquismo.

Hoxe estou aquí, con ese compromiso que nos leva sempre ao fogar, para comentar esas publicacións que o noso país é quen de xerar, de achegarnos.

Veño deste outro lugar: http://www.librodearena.com/ducon/blog onde non sempre saber recibir aos que chegan. Motivo da mudanza.

Aquí saberei recibirvos como é propio polas nosas latitudes: cun bo lume, comida a esgalla e unha boa parrafada.

Pasade pois, bo proveito.